GEOPARCO SARDEGNA / "SU MINADORE"

di Gavino Dettori
Un'isforradu niedhu a mesu costa, chi parede sa ucca de s'inferru:
minieras de carvon'e de ferru, chircadas preda preda sutta e crosta.
In galleria funguda e male posta, no connosches'istiu ne ierru:
est sa tumba de s'omine iu, candho ndhessis se prus mortu che biu.
Su manzanu ti crama sa sirena, chi pared'una oghe de piantu.
Unu lamentu chi t'intrad'invenas, t'infrittada su coro tottugantu.
Intras'in boidas carenas, t'ingullidi sa terra in d'unu lampu.
Su bisonzu ti cramad'a s'intrada, isperas ancora in vida sa torrada.
Sa terra est totta isboidada, dae poveros chi iscavan minieras,
sighende filos de onzi manera, de minerales a minas pesadas.
Prummones e bucas'impastadas, de pruer'e a lungh'e lumèra.
Totu pro ti alanzare sa vida, ma incurtziandhe ses sa dispedida.
Sa zente est sempre cumandhada, dae chie su mundhu at dominadu.
De onzi bene s'est impossessadu, pro ateros pius cosa non b'ada.
Sa vida la alanzas chin suore, ma pro issos non tenede valore.
Oe su suffrimentu est finidu, nessunu est prus suttaderra.
Non prus triballendhe a mattaterra, pruere alidendhe e illivrinidu.
Cantu babbos nostros'an suffrìdu, non podimus'oe irmentigare:
sa siendha depimus chircare, cussu chi de sutta est su boìdu.
Tottu est iscrittu suttaderra, a punta de piccone e de matzetta,
chirchendhe minerales'a minetta, pro arrichire cumandhantes in terra.
Oe bi cherimus torrare, in bisita pro lezere sos'iscrittos.
Minieras, castedhos e registros, a s'istoria valore est'a li dare.
Sos terrinos puru a risanare, pro ndhe podere tottu godire,
sos minores puru pro ischire, contr'a s'isfruttamentu est a lottare.
S'isfruttamentu e su suffrimentu, de s'omine in carenas peleadu,
ca riposu mai l'ana dadu, attendhelu a s'isfinimentu.
Su dirittu a sa vida est gherradu, chin sambene e suore sufridu,
su poveru mai at godidu, fintzas sa vida l'an furadu.
Cussa vida però no est perdìda, in sa cussentzia la tenimus bia,
chi non sutzedada un'atera ia, sos zovanos la tenzan'ischìda.
Sun mortes pro sa tzivilidade, siana pro onzunu de ammentu,
sia de onzunu s'intentu: libertade e rispettu a tottu dade.